Vice Mayor ng Noveleta, Nagpanggap na Basurero SA Araw ng Kanyang Kaarawan
NOVELETA, Cavite — Sa halip na isang selebrasyon na may handaan at pagbati mula sa mga kaibigan at kakilala, mas piniling gawing makabuluhan ni Noveleta Vice Mayor Dino Reyes Chua ang kanyang ika-46 na kaarawan sa pamamagitan ng pagsabak mismo sa trabaho ng mga taong araw-araw na naglilinis ng kanilang komunidad.
Noong Setyembre 25, dakong alas-5 ng hapon sa Barangay Salcedo II, Noveleta, nakibahagi si Chua sa aktuwal na paghahakot at paglilipat ng mga basura.
Makikita sa mga larawan ang opisyal na nakasuot ng sombrero, face covering, gloves at bota habang tumutulong sa pagkarga ng mga sako at basura sa isang truck.
Hindi lamang basta pakikisalamuha ang ginawa niya.
Ilang oras siyang nakibahagi sa gawaing karaniwang ginagawa ng mga basurero, pagbubuhat ng mabibigat na sako, pagkarga ng basura at pakikihalubilo sa mga manggagawa na nasa likod ng araw-araw na paglilinis ng komunidad.
“Sa araw ng aking kaarawan, minabuti ko na makasama ko ang mga basurero at iparamdam sa kanila kung gaano kaimportante ang trabaho nila sa ating bayan,” pahayag ni Chua.
Aniya, nais din niyang maranasan kahit sa isang araw lamang kung gaano kahirap ang trabahong ginagampanan ng mga basurero.
Matapos ang paghahakot ng basura, hindi doon nagtapos ang selebrasyon.
Nagkaroon din ng salu-salong pagkain kasama ang mga basurero, street sweepers, traffic enforcers at mga miyembro ng Mayor’s Auxiliary Force na kabilang sa mga nagsasagawa ng paglilinis at pagtulong sa mga operasyon sa komunidad, kabilang ang paglilinis at pagbubungkal sa mga kanal upang alisin ang mga bara.
Namahagi rin ng bigas at bagong sapatos sa mga manggagawa bilang bahagi ng kanyang birthday celebration.
Sa halip na ang celebrant ang siyang tumanggap ng regalo, ang mga manggagawang madalas nasa lansangan ang naging sentro ng kanyang selebrasyon.
Ayon sa impormasyong ibinahagi tungkol sa selebrasyon, hindi naman ngayon lamang ginagawa ni Chua ang ganitong uri ng pakikipagdiwang.
Taun-taon umano niyang isinasama sa kanyang birthday celebration ang mga sektor na karaniwang nasa lansangan at kabilang sa mga manggagawang mababa ang kita, gaya ng mga tricycle driver, pedicab driver, magbobote at street sweepers, bukod sa iba pa.
Ngunit ngayong taon, idinagdag niya ang isang bagay na personal niyang sinubukan—ang mismong pagsabak sa trabaho ng mga basurero.
Sa mga larawang kuha sa aktibidad, makikitang hindi lamang siya nakatayo at nakamasid.
Aktuwal siyang nakikibuhat habang sama-samang nagkakarga ng mga sako at garbage bags sa truck.
Para kay Chua, ang paglilinis ng mga kalsada at komunidad ay isang trabahong madaling hindi mapansin kapag maayos ang kapaligiran ngunit ramdam ang halaga kapag wala ang mga taong gumagawa nito.
Sa kanyang birthday celebration, ipinakita niya ang isang araw ng pakikibahagi sa trabahong karaniwang ginagawa ng mga basurero at iba pang frontliner sa kalinisan at kaayusan ng bayan.
Si Chua ay kasalukuyang Vice Mayor ng Noveleta ngayon.
Sa pagtatapos ng araw, nauwi sa isang simpleng salu-salo ang aktibidad—isang kaarawan na hindi lamang tungkol sa mismong celebrant, kundi tungkol sa mga manggagawang araw-araw na nasa kalsada upang panatilihing malinis, maayos at ligtas ang kanilang komunidad.
Photo: Jun Carangalan